20 di mart a wordu detektá un posibel kaso di chikungunya serka un habitante di Boneiru. E persona a hasi tèst, pero e resultado ainda mester wordu konfirmá pa laboratorio.

Segun informashon, e persona a sintí keho ku ta kuadra ku chikungunya durante un biahe pa Sürnam. Probablemente e infekshon a tuma lugá un siman promé durante su estadia na Sürnam.

Sürnam ta enfrentá un oumento di chikungunya desde kuminsamentu di aña, i na Aruba tambe a reportá algun kaso serka biaheronan ku a regresá for di Sürnam. Otro paisnan den region, manera Cuba i Guyana, tambe tin brotenan di chikungunya aktualmente.

Tim di GGD Boneiru / Salubridat Públiko a tuma medida preventivo den i rònd di bibienda di e persona, pa evitá propagashon di e vírùs.

Tokante chikungunya
Chikungunya ta un vírùs ku sangura ta transmití. E síntomas por inkluí:

• Keintura 
• Doló di kabes
• Doló di múskulo i kurpa
• Walmentu di stoma
• Rebultashon di kueru

Hopi biaha e malesa ta leve, pero algun persona por sintí doló di artikulashon (skarnir) ku por dura varios luna.

Datos mundial

• Chikungunya ta presente na mas ku 100 pais den tropiko i sub-tropiko
• E vírùs a wordu deskubrí promé biaha na Afrika na aña 1950
• E vírùs ta transmití prinsipalmente pa sangura Aedes aegypti i Aedes albopictus
• Durante brotenan mundiál, e malesa por afektá miles di hende, spesialmente den paisnan di Sur amérika, Karibe, Afrika, i Asia
• No tin un bakuna pa prevenshon disponibel

Si bo tin síntomanan, spesialmente despues di biahe na áreanan kaminda chikungunya ta presente, tuma kontakto ku bo dòkter di kas. Protehá bo mes kontra sangura i eliminá lugánan kaminda sangura por reprodusí.

Advertisement