Tourism Corporation Bonaire (TCB) a lansa un inisiativa nobo yamá “Cruise-to-Stay”, ku meta pa haña konosementu mas profundo tokante komportashon, motivashon i gastunan di pasaheronan krusero na Boneiru, i finalmente konbertí nan den bishitantenan stayover ku un estadia mas largu.

Den kuadro di e insiativa, pasaheronan krusero ta invitá pa yena un enkuesta kòrtiku durante òf despues di nan bishita. Komo estímulo, partisipantenan tin chèns di gana un biahe ida i buèlta pa Boneiru pa eksperensiá e isla komo un bishitante stayover.

Segun direktor Elesiër Angel, e inisiativa ta representá un kambio den e manera ku turismo krusero ta abordá. El a indiká ku e meta ta pa forma un brùg entre bishitanan di un dia i estadianan mas largu, mientras ku tambe ta fortifiká uso di dato pa mehorá e sektor.

E inisiativa ta keda realisá den kolaborashon ku Delfins Beach Resort Bonaire, Caribe Car Rental i Blue Bay Bonaire, ku ta kontribuí na e pakete di premio. E promé ganadó lo wòrdu anunsiá riba 12 di yanüari 2027. E premio ta inkluí un buelo ida i buèlta pa dos persona, un estadia di shete anochi, transporte lokal i un eksperensia eksklusivo riba laman ku trep riba boto di bela, snòrkelmentu i sena.

Advertisement