Bonaire Laboratorium a wordu akreditá ku eksito pa tèstnan di kímika klíniko i hematológiko segun e norma internashonal ISO 15189. Durante e evaluashon, e laboratorio a risibí komplimentu di Konseho di Akreditashon Hulandes (RvA) pa su kalidat haltu di trabou i tambe nan rendimentu.

Ademas di a keda akreditá, BONLAB a optené un ekstenshon di su rekonosimentu di kalidat pa tèstnan ku ta wòrdu realisá na nòmber di GGD. Esaki ta mustra e ròl importante di BONLAB komo laboratorio di salubridat públiko na Boneiru.

E akreditashon ISO 15189 ta konfirmá ku e proseso di laboratorio, kontrol di kalidat i e kapasidat di e tim ta kumpli ku normanan internashonal. Esaki ta esensial pa garantisá diagnóstikonan konfiabel pa pashèntnan i pa sektor di kuido i salú.

Ku e evaluashon positivo i e ekspanshon di su akreditashon, BONLAB ta sigui demostrá su kompromiso ku kalidat, inovashon i mehorashon kontinuo den kuido di salú i salubridat públiko na Boneiru.

BONLAB, e laboratorio di diagnóstiko médiko di Boneiru, ta evolushonando den un instituto mas amplio ku enfoke riba salubridat públiko, medio ambiente i seguridat di kuminda.

Ademas di duna servisio di diagnóstiko di kalidat haltu pa kuido di salú, BONLAB ta intensifiká su trabou riba vigilá e kalidat di e ambiente di bida, inkluyendo awa, medio ambiente i kuminda.

Pa medio di kolaborashon ku diferente instituto i partisipashon den investigashon sientífiko, BONLAB ta kontribuí na inovashon i na fortifikashon sostenibel di salubridat públiko na Boneiru i den region di Karibe.