Hunta di Supervishon Finansiero (Cft) a ekspresá krítika fuerte pa loke ta trata kalidat di relatonan finansiero di Entidat Públiko Boneiru (OLB). Di akuerdo ku Cft, e informashon suministrá pa di kuater kuartal di 2025 no ta sufisientemente konfiabel i verifikabel pa yega na un huisio supstansial.

E rapòrt ta mustra ku Boneiru ta bai den direkshon di un défisit provishonal di 15.4 mion dòler. Cft ta indiká ku kousanan di esaki no ta kla for di e sifranan i ku splikashonnan adishonal di parti di OLB tampoko no ta duna klaridat.

Ademas, Cft ta bisa ku e rapòrt di ehekushon no a wòrdu inkorporá korektamente den e promé konsepto di kambio di presupuesto (OBW) pa 2026, miéntras ku esaki mester forma e base pa ahustenan na e presupuesto.

Ounke kambio di presupuesto pa 2026 ta saldo-neutral i balansa presupuestario tei, Cft ta ekspresá preokupashon pa loke ta trata ousensia di splikashonnan esensial. Por ehèmpel, e pronóstiko di vários aña no ta supstansial, i no tin sufisiente splikashon pa loke ta trata kambionan di entrada i gastu.

Tambe Cft ta kuestioná maneho finansiero di Boneiru. Segun e Hunta, e forma ku a suministrá informashon i transkurso di e proseso ta inspirá “onvoldoende vertrouwen” den e kalidat di maneho finansiero.

Cft ta konsehá Boneiru pa ahusta e kambio di presupuesto riba vários punto. Por ehèmpel, mester produsí un presupuesto kla di vários aña ku nota di splikashon, tur kambio mester wòrdu splika mihó, i un overrun di 0.5 mion dòler den “bijzondere uitkeringen” mester wòrdu prosesá den e kuentanan anual di 2025.

Mas aleu a keda palabra ku Boneiru lo entregá un di dos kambio di presupuesto ku e próksimo rapòrt di ehekushon na 2026, inkorporando sifranan mas aktual. Ku e krítika aki, Cft ta supraya importansia di un mihó maneho finansiero i transparensia pa ku tantu supervisornan komo Konseho Insular.

Lesa e Dokumento aki: