Hulanda ta konfrontá ku un skarsedat deskomunal di kas ku ta sigui bira mas serio, ku segun sifranan resien tin un nesesidat di mas ku 400.000 kas. E problema aki ta afektá tantu e hóben nan ku ke kumpra nan promé kas, komo tambe hende ku ta buskando pa hür.

E demanda pa kas ta hopi mas altu ku e oferta. Den último añanan, preis di kas a subi ku mas di 30% na algun parti di Hulanda, miéntras ku preis di hür a sigui subi. Den algun siudat grandi manera Amsterdam, lista di espera pa kasnan sosial por yega te 10 pa 15 aña.

Pa hopi hende, spesialmente esnan ku entrada medio i abou, ta bira kada biaha mas difísil pa haña un kas pagabel. Hóbenan ta keda mas largu ku nan mayornan, òf nan ta obligá pa kompartí kas.

Gobièrnu hulandes a rekonosé e problema i a pone meta pa konstrukshon di mas ku 900.000 kas nobo di awor te ku 2030. Di tur manera, e proseso ta tuma tempu pa motibu di regulashonnan, falta di tereno i kapasidat limitá den sektor di konstrukshon.

E situashon aki ta krea preokupashon, no solamente pa habitantenan di Hulanda, pero tambe pa studiante i trahadónan for otro paisnan den Reino Hulandes. Hopi di nan ta enfrentá mes un problema pa haña kas pagabel ora nan yega Hulanda.

Si no bin ku medidanan mas rápido i efektivo, e falta di kas aki por sigui krese den añanan ku ta bin.

Advertisement