Wardakosta di Karibe Hulandes huntu ku Wardakosta di Saint Martin a firma un tratado nobo ku ta permití pa nan persiguí botonan sospechoso di trafikashon di droga den awanan teritorial di otro. E tratado a ser firmá djamars último entre Reino Hulandes i Fransia.

E akuerdo ta ehekuta e tratado di San José, ku tin komo meta pa fortalesé kooperashon regional den e lucha kontra trafikashon di droga den Karibe. Ku e tratado nobo, varios restrikshon operashonal ku tabata limitá intersepshon di botonan sospechoso rònt di Sint Maarten i Saint Martin a keda eliminá.

Según outoridatnan, Sint Maarten i Saint Martin ta wòrdu usa regularmente komo ruta di tránsito pa droga for di Sur Amérika rumbo pa Nort Amérika i Europa. P’esei, un koperashon mas intensivo i transparente entre e dos paisnan ta konsiderá esensial.

E regulashonnan nobo ta definí klaramente e kondishonnan bou di kua Wardakosta di Karibe Hulandes por operá den awanan teritorial di Sint Maarten i Saint Martin durante persekushon di botonan sospechoso. Durante e operashonnan, e uso di violensia ta eksplísitamente ekskluí. E tratado ta inkluí tambe varios disposishonnan tékniko i operashonal pa garantisá un ehekushon efektivo di e aktividatnan.

Prome minister di Sint Maarten, Luc Mercelina, a firma e tratado na nòmber di Reino Hulandes. Na nòmber di Fransia, e dokumento a wòrdu firmá pa minister pa Teritorionan Franses Ultramar, Naïma Moutchou.

Advertisement