Papiamentu
Djadumingu 8 di mart, alrededor di 5:00 di atardi, meldkamer sentral a risibí un notifikashon tokante dos persona ku tabata snòrkel den laman pafó di Lac Baai i a drenta den problema.
Segun informashon preliminar, koriente fuerte a hala e dos persona mas afó den laman, loke a hasi ku nan no por a regresá kosta riba nan mes forsa. Pa motibu di e situashon, a pidi asistensia di helikòpter di wardakosta i tambe personal di ambulans pa yuda saka e personanan for di awa i duna nan asistensia médiko.
Ku yudansa di personanan ku tabata presente na e lugá, a logra saka e víktimanan for di laman. Mesora a kuminsá ku reanimashon di un di nan. Sinembargo, apesar di tur esfuerso di esnan presente i di servisionan di emergensia, e reanimashon no a logra salba su bida.
E víktima, un hòmber turista ku inisialnan P.J.M., di 66 aña di edat, a fayesé na e sitio. Personal di ambulans a kontrolá e otro persona ku tabata envolví den e insidente. El a resultá sin herida serio i no tabatin mester di tratamentu médiko.
Departamento di Opsporing di KPCN a kuminsá un investigashon pa determiná tur e sirkunstansianan rondó di e insidente.
Lokal
Turista di 66 aña fayesé despues di problema durante snòrkel na Lac Baai
Komentarionan (0)
Laga un Komentario
Bo Imeil lo NO ser publiká. Hòkinan obligatorio ta marká ku *
Kargando komentarionan...