Papiamentu
Selibon i Entidat Públiko Boneiru a kuminsá dia 18 di mart 2026 ku un operashon di kontrol pa kandela bou di tera na lèntfel Lagun. E trabou lo dura te djabièrnè 20 di mart i ta keda realisá den kolaborashon ku ekspertonan di Afvalzorg.
Durante e preparashon, Afvalzorg a identifiká varios punto kaminda temperatura ta mas haltu i a formulá un plan paso pa paso pa atendé ku e fokonan ku riesgo mas haltu pa hende i medio ambiente. E sup-área di Lagun a wordu dividí den sinku sektor pa traha di manera struktural i efektivo.
Trabounan ta keda realisá durante dia entre 08:00 i 15:00 or. Pa prevení plamamentu mas grandi i limitá molèster pa bisindario, e ekiponan ta purba kontrolá e kandela bou di tera pa medio di koba tereno, paga e fokonan i tapa e tereno. Pa asegurá seguridat, un trùk di awa i material pa tapa ta presente durante e trabou.
Pa mantené un kontrol kontinuo, Entidat Públiko Boneiru, Selibon i Afvalzorg ta monitor e area regularmente ku un ‘dashboard’ spesial ku ta permití pa deskubrí fokonan tempran i evaluá riesgo. E sistema ta yuda pa aktua rapido i efektivamente, i ta redusí peliger pa medio ambiente i komunidat.
Kargando komentarionan...