Tourism Corporation Bonaire (TCB), den kolaborashon ku Bonaire International Airport (BIA), a representá Boneiru na Routes Americas 2026 na Rio de Janeiro, Brasil. E evento internashonal aki, enfoká riba desaroyo di konekshon aéreo. E reunion aki konsistí di mas ku 900 profeshonal den industria di aviashon, inkluyendo ehekutivonan di aerolíneanan, outoridatnan di aeropuerto i representantenan di destinashon.

Durante e konferensia, delegashon di Boneiru ta tene un seri di enkuentro importante ku partnernan di aviashon manera Avianca, WestJet, TUI, KLM, GOL, Delta Air Lines, Copa Airlines, Wingo, American Airlines i United Airlines. E enfoke prinsipal ta riba evaluashon di prestashon di rutanan eksistente, fortifikashon di relashon i eksplorashon di oportunidat pa konekshonnan aéreo nobo.

Segun direktor di TCB, Elesiër Angel, eventonan manera Routes Americas ta krusial pa desaroyo di turismo i transporte aéreo di Boneiru. El a indiká ku konektividat ta esensial, no solamente pa atrae bishitantenan, pero tambe pa sostené e komunidat lokal. Un di e prioridatnan ta sigui ekspandé rutanan pa merkadonan importante i alabes eksplorá oportunidatnan nobo, partikularmente den Amérika Latino i Suramérika.

E delegashon ta risibí sosten di Altura Aviation Consultancy, ku ta yuda ku análisis di merkado i fortifikashon di e ‘business case’ pa Boneiru ta mihó posishoná durante negosiashonnan ku partnernan di aviashon.