Den un karta mandá pa Frakshon di UPB, Frakshon di MPB a anunsia ofisialmente ku nan a terminá e negosashonnan pa formashon di un koalishon nobo ku UPB. E desishon a sigui despues di mas di un luna di deliberashonnan ku, segun MPB, a wordu repetidamente stroba dor di diferensianan fundamental.

Segun MPB, un di e punto prinsipal di desakuerdo tabata e repartishon di diputado. UPB a insistí ku nan ke risibí dos diputado den e koalishon nobo, miéntras MPB i Frakshon Serberie a defendé e prinsipio di un diputado pa kada frakshon, den spiritu di igualdat i balansa. E tema aki a keda un punto di frikshon durante varios reunion.

Tambe a surgi diferensia tokante direktoradonan. Aunke Finansa tabata deklará komo promé prioridat pa UPB, finalmente nan a opta pa direktorado di R&O. MPB a indiká ku nan a mustra fleksibilidat pa yega na un kompromiso, inkluso adaptando proposishonnan relashoná ku puestonan, pero segun nan, no a logra un konsenso final.

Ademas, MPB a ekspresá preokupashon ku durante e mes periodo di negosashon ku nan, UPB tabata den un fase avansá di negosashon tambe ku Partido Demokrat pa formashon di un otro koalishon. Segun MPB, esaki no ta kontribuí na konfiansa den e proseso.

MPB a disidi di hala nan mes for di mesa di negosashon. Den su deklarashon final, frakshon a deseá UPB tur éksito den kualke trayekto ku nan disidi di sigui pa formashon di un gobiernu nobo.

Dokumento:

Advertisement