Aruba ta selebrá un momento históriko importante: 50 aña di su Himno Nashonal “Aruba Dushi Tera” i su bandera ofisial, tur dos introdusí riba 18 di mart 1976. E fecha aki, konosí awor komo Dia di Himno i Bandera, ta simbolisá un paso grandi den e formashon di identidat nashonal di e isla.

Promé ku 1976, Aruba, komo parti di Antia Hulandes, tabata usa e himno antiano. Sinembargo, ya desde añanan 1950 tabatin un deseo kresiente pa tin un simbolo propio. Den e periodo aki, Juan Chabaya “Padu” Lampe a skirbi e letra i Rufo Wever a komponé e melodia di un wals ku a reflehá amor pa patria. E kantika “Aruba Dushi Tera” a bira popular den komunidat, spesialmente despues ku e grupo “De Trupialen”, bou di direkshon di Frere Alexius, a inkluí esaki den nan repertorio. Na 1954, e kantika a keda grabá i difundí riba henter isla, loke a fortifiká su lugá den kultura Arubiano.

Na 1976, Gobièrnu Insular a tuma pasonan pa formalisá e himno. Un komishon instalá riba 25 di febrüari a rekomendá su adopshon ofisial, inkluyendo un último kuplèt inspirá pa Hubert “Lio” Booi, ku ta resaltá libertat i unidat. Riba 16 di mart 1976 a bin aprobashon ofisial, i dos dia despues, riba 18 di mart, e himno a resoná pa promé biaha komo himno nashonal durante un aktividat na Stadion Wilhelmina na Dakota, interpretá pa e koro di Maybeline Arends Croes ku kompañá musikalmente.

E fecha di 18 di mart tin tambe un balor históriko mas profundo, relashoná ku e lucha pa outodeterminashon di Aruba, ora na 1948 un petishon a ser presentá na Reina Juliana pa pidi mas derecho pa e pueblo Arubiano, bou liderazgo di Shon A. Eman.

Despues di logra Státus Aparte riba 1 di yanüari 1986, e bandera a bira ofisialmente e bandera di Pais Aruba den Reino Hulandes. Na 2014, e definishonnan ofisial di e kolonan a keda a stipulá pa mantené uniformidat i rèspèt pa e símbolonan nashonal.

Advertisement