Papiamentu
Djasabra 28 di febrüari, rondó di 10’or di anochi, un patruya di polis ku tabata riba Kaya Andres A. Emerenciana a kontrolá un outo ku tabata manehá ku plachi di number falsifiká.
Durante investigashon a sali na kla ku e shofùr ya a haña but anteriormente pa mesun infrakshon aki. Sinembargo, e no a tuma medidanan pa koregí e situashon ni a kita e plachinan ilegal.
Na e sitio, polis a duna e shofùr un último oportunidat pa kambia e plachinan falsifiká pa esnan original. E shofùr atrobe no a kumpli ku e instrukshon. Debí na esaki, polis a konfiská tantu e vehíkulo komo e plachinan di number falsifiká.
Kuerpo Polisial ta rekordá tur doño di vehíkulo ku nan ta obligá pa manehá solamente ku plachi di number original, emití pa OLB. Manehá un outo òf trùk sin plachi di number, ku solamente un plachi, òf ku plachinan falsifiká, ta un infrakshon i por resultá den un but. E mesun lei ta konta tambe pa usuarionan di gòlfkar.
Kargando komentarionan...